OMMAVIY OFERTA

KIRISH

Ushbu hujjat “Consciousness” Mas’uliyati Cheklangan Jamiyati (keyingi o‘rinlarda – “Platforma” yoki “Komissioner”) INN (STIR) 312759504 O‘zbekiston Respublikasi Fuqarolik kodeksining 369-moddasiga muvofiq “Chaqqon Med” axborot platformasi orqali maslahat (konsultatsiya) xizmatlarini ko‘rsatishni istagan, o‘zini o‘zi band qilgan shaxs maqomiga ega bo‘lgan muomalaga layoqatli jismoniy shaxslarga – shifokorlarga yo‘naltirilgan rasmiy ommaviy ofertadir (keyingi o‘rinlarda – “Oferta”).

Platforma komissioner va axborot vositachisi sifatida harakat qiladi. Platforma tibbiy tashkilot emas, mustaqil ravishda tibbiy xizmatlar ko‘rsatmaydi, tashxis qo‘ymaydi va davolash tayinlamaydi.

Shifokor Platformadan foydalanishdan oldin ushbu Oferta bilan to‘liq tanishib chiqishi shart. Platformada ro‘yxatdan o‘tish, Platformaning istalgan funksiyasi yoki dasturiy imkoniyatidan foydalanish fakti Shifokor tomonidan ushbu Ofertani to‘liq va so‘zsiz qabul qilishni (aksept) anglatadi. Shifokor Ofertaning biror qoidasiga rozi bo‘lmasa, u Platformadan foydalanish huquqiga ega emas.

Muhim: Platforma orqali faqat axborot-maslahat xarakteridagi konsultatsiyalar ko‘rsatiladi. Platforma orqali tashxis qo‘yish va davolash ishlarini olib borish taqiqlanadi (§3).

§1. ATAMALAR VA TA’RIFLAR

1.1. “Platforma” (“Chaqqon Med”) – veb-sayt, iOS va Android uchun mobil ilovalar, API-interfeyslar va boshqa dasturiy komponentlardan iborat axborot tizimi bo‘lib, Shifokorlar va Foydalanuvchilar o‘rtasidagi o‘zaro hamkorlikni masofaviy konsultatsiya xizmatlari sohasida ta’minlaydi.

1.2. “Shifokor” – O‘zbekiston Respublikasi qonunchiligida belgilangan tartibda o‘zini o‘zi band qilgan shaxs sifatida ro‘yxatdan o‘tgan, oliy tibbiy ma’lumotga hamda amaldagi mutaxassislik hujjatlariga ega bo‘lgan, ushbu Oferta shartlarini aksept qilgan muomalaga layoqatli jismoniy shaxs.

1.3. “Komissioner” – “Consciousness” MChJ, Platformada Shifokorning takliflarini joylashtirish hamda Shifokor bilan Foydalanuvchilar o‘rtasida konsultatsiya xizmatlari bo‘yicha shartnomalar tuzishda ko‘maklashish xizmatlarini ko‘rsatadi.

1.4. “Foydalanuvchi” (“Bemor”) – Shifokordan konsultatsiya xizmatlarini qidirish, bron qilish va olish uchun Platformadan foydalanuvchi jismoniy shaxs; “Iste’molchilar huquqlarini himoya qilish to‘g‘risida”gi Qonunda belgilangan tartibda iste’molchi.

1.5. “Konsultatsiya” – Shifokor tomonidan Platformaning himoyalangan video aloqasi orqali masofaviy tarzda Foydalanuvchiga ko‘rsatiladigan, tashxis qo‘yish va davolashni o‘z ichiga olmaydigan axborot-maslahat xarakteridagi xizmat (§3).

1.6. “Shaxsiy cabinet” – Shifokorning profilini, takliflarini, yozuvlarni qayta ishlash, hisobotlarni ko‘rish hamda Platforma bilan o‘zaro hamkorlik uchun mo‘ljallangan Platformaning himoyalangan bo‘limi.

1.7. “Tariflar” – Platformada va/yoki Shaxsiy kabinetda e’lon qilinadigan, konsultatsiya narxlari, komission mukofot stavkalari va hisob-kitoblarga oid boshqa shartlarni belgilovchi ma’lumotlar. Tariflar ushbu Ofertaning ajralmas qismi hisoblanadi.

§2. SHARTNOMA PREDMETI VA PLATFORMANING HUQUQIY MAQOMI

2.1. Platforma Shifokor tomonidan Foydalanuvchilarga konsultatsiya xizmatlari ko‘rsatilishini tashkil etadi.

2.2. Konsultatsiya mazmuni, berilgan tavsiyalarning asoslanganligi, kasbiy etika va ushbu Ofertada belgilangan taqiqlarga rioya etish uchun javobgarlik faqat Shifokorga yuklatiladi (“Fuqarolar sog‘lig‘ini saqlash to‘g‘risida”gi Qonun). Platforma konsultatsiyalar ijrochisi emas va Shifokorning kasbiy xulosalariga aralashmaydi.

2.3. Platformadan foydalanish Platforma bilan Shifokor o‘rtasida mehnat munosabatlarini vujudga keltirmaydi. Shifokor o‘z faoliyatini mustaqil, o‘z tavakkalchiligida va o‘zini o‘zi band qilgan shaxs maqomida amalga oshiradi.

§3. KONSULTATSIYANING XARAKTERI. TASHXIS QO‘YISH VA DAVOLASH TAQIQI

3.1. Platforma orqali Shifokor tomonidan Foydalanuvchilarga faqat axborot-maslahat xarakteridagi konsultatsiyalar ko‘rsatiladi. Konsultatsiya tibbiy yordam ko‘rsatishni, yuzma-yuz tibbiy qabulni yoki tibbiy tashkilotga murojaatni almashtirmaydi.

3.2. Konsultatsiya doirasida Shifokorga quyidagilar ruxsat etiladi:

• salomatlik masalalari bo‘yicha umumiy axborot-maslahat berish, sog‘lom turmush tarzi, profilaktika va parvarish bo‘yicha umumiy xarakterdagi tavsiyalar berish;
• Foydalanuvchi bayon qilgan holat va shikoyatlar bo‘yicha qaysi mutaxassislik shifokoriga yoki qanday turdagi tibbiy tashkilotga yuzma-yuz murojaat qilish maqsadga muvofiqligini tushuntirish;
• Foydalanuvchi taqdim etgan tibbiy hujjatlar va tekshiruv natijalari mazmunini axborot xarakterida, tashxis qo‘ymasdan va davolash tayinlamasdan tushuntirish;
• yuzma-yuz tibbiy ko‘rikdan yoki tekshiruvdan o‘tish zarurligi to‘g‘risida tavsiya berish;
• shoshilinch tibbiy yordam talab etilishi mumkin bo‘lgan belgilar aniqlanganda Foydalanuvchini zudlik bilan tez tibbiy yordam xizmatiga (103) yoki tibbiy tashkilotga yo‘naltirish.

3.3. Taqiqlar. Platforma orqali konsultatsiya ko‘rsatishda Shifokorga quyidagilar qat’iyan taqiqlanadi:

• tashxis qo‘yish, shu jumladan dastlabki yoki taxminiy tashxisni rasmiylashtirish, tashxisni tibbiy hujjatlarda (shu jumladan IKB-10 kodlari bilan) qayd etish;
• davolashni tayinlash, o‘zgartirish, bekor qilish yoki davolash jarayonini olib borish (kuzatish);
• tibbiy aralashuvlar (muolajalar, operatsiyalar va boshqalar) o‘tkazish yoki ularni masofadan boshqarish;
• mehnatga layoqatsizlik varaqalari, tibbiy ma’lumotnomalar hamda tashxis yoki davolashni tasdiqlovchi boshqa rasmiy tibbiy hujjatlarni berish;
• konsultatsiyani tibbiy yordam, tashxis qo‘yish yoki davolash sifatida taqdim etish, reklama qilish yoki Foydalanuvchini shunday deb o‘ylashga undash.

3.4. Tashxis qo‘yish va davolash faqat amaldagi litsenziyaga ega tibbiy tashkilotlar doirasida, Platformadan tashqarida amalga oshirilishi mumkin. Shifokorning Platformadan tashqaridagi faoliyati ushbu Shartnoma predmetiga kirmaydi; bunday faoliyat uchun Platforma hech qanday javobgarlik olmaydi.

3.5. Ushbu §3 talablarining buzilishi Shartnomaning muhim buzilishi hisoblanadi va Shifokor kirishini darhol to‘xtatib qo‘yish hamda Shartnomani bir tomonlama bekor qilish (§11) uchun asos bo‘ladi. Taqiqlar buzilishi oqibatida yetkazilgan zarar uchun javobgarlik to‘liq Shifokor zimmasiga yuklanadi.

§4. AKSEPT, KAFOLATLAR VA SHARTNOMA TUZILMASI

4.1. Ofertaning aksepti deb Shifokorning quyidagi harakatlaridan biri hisoblanadi: (a) Platformada ro‘yxatdan o‘tish jarayonida “Roziman” (yoki mazmunan shunga o‘xshash) tugmasini bosish; (b) Platformaning istalgan funksiyasidan Shifokor sifatida foydalanishni boshlash. Shartnoma aksept vaqtidan boshlab kuchga kiradi va qo‘shimcha qog‘oz shaklda imzolashni talab qilmaydi.

4.2. Ofertani aksept qilib, Shifokor quyidagilarni tasdiqlaydi va kafolatlaydi:

• u 18 yoshga to‘lgan, to‘liq muomalaga layoqatli jismoniy shaxs ekanligini;
• u O‘zbekiston Respublikasi qonunchiligida belgilangan tartibda o‘zini o‘zi band qilgan shaxs sifatida ro‘yxatdan o‘tganligini va ushbu maqomni Shartnoma amal qilishi davomida saqlab turishini;
• u oliy tibbiy ma’lumot to‘g‘risidagi amaldagi diplom hamda mutaxassisligi bo‘yicha amaldagi sertifikat/malaka hujjatlariga ega ekanligini (“Fuqarolar sog‘lig‘ini saqlash to‘g‘risida”gi Qonunning 38-moddasi) va ularning nusxalarini Platformaga taqdim etganligini;
• ro‘yxatdan o‘tishda va profilda ko‘rsatilgan barcha ma’lumotlar (F.I.Sh., mutaxassislik, ish staji, ta’lim va boshqalar) haqqoniy va to‘liq ekanligini;
• u Platforma orqali faqat §3 da belgilangan doiradagi konsultatsiyalar ko‘rsatishini hamda litsenziya talab etiladigan tibbiy faoliyatni Platforma orqali amalga oshirmasligini;
• unga nisbatan tibbiy faoliyat bilan shug‘ullanishni taqiqlovchi sud qarori yoki boshqa cheklovlar mavjud emasligini;
• Shaxsiy kabinetga kirish ma’lumotlarining maxfiyligini ta’minlashini va akkauntidan uchinchi shaxslar foydalanishiga yo‘l qo‘ymasligini.

4.3. Platforma ro‘yxatdan o‘tishni tasdiqlashdan oldin Shifokor taqdim etgan hujjatlar va ma’lumotlarni tekshirish (verifikatsiya) huquqiga ega hamda tekshirish natijalariga ko‘ra ro‘yxatdan o‘tishni rad etishi mumkin.

4.4. Shartnoma ushbu Oferta (§1–§17) va Maxfiylik siyosatidan iborat. O‘zbekiston Respublikasi qonunchiligining imperativ normalari barcha hujjatlar ustidan shubhasiz ustuvorlikka ega. Hujjatlar ierarxiyasi §17.1 da belgilangan.

§5. XIZMAT KO‘RSATISH TARTIBI

5.1. Konsultatsiyalar faqat masofaviy video formatda, Platformaning himoyalangan video aloqasi orqali ko‘rsatiladi. Boshqa formatlar Platforma tomonidan kelgusida §12 tartibida joriy etilishi mumkin.

5.2. Har bir konsultatsiya quyidagilarni o‘z ichiga oladi: Foydalanuvchini identifikatsiya qilish; Foydalanuvchining axborotlashtirilgan ixtiyoriy roziligini olish; konsultatsiya yakunlari bo‘yicha Platformada shakllantiriladigan va Shifokorning elektron raqamli imzosi (ERI) bilan imzolanadigan tavsiyaviy xulosa. Tavsiyaviy xulosada tashxis qayd etilmaydi, davolash tayinlanmaydi (§3).

5.3. Shifokor konsultatsiya jadvalini va mavjud vaqtlarini Shaxsiy kabinet orqali mustaqil belgilaydi va boshqaradi. Konsultatsiya narxlari Platforma tomonidan belgilanadi.

§6. PLATFORMANING HUQUQ VA MAJBURIYATLARI

6.1. Platforma majbur:

• Platformaning uzluksiz texnik ishlashi va mavjudligini ta’minlash;
• yozuvlar va buyurtmalar to‘g‘risidagi ma’lumotlarni Shifokorga o‘z vaqtida uzatish;
• ma’lumotlarning xavfsizligi va maxfiyligini ta’minlash (§10);
• mablag‘larni Tariflarda belgilangan tartibda o‘z vaqtida o‘tkazish;
• Ofertadagi o‘zgarishlar haqida kamida 30 kalendar kun oldin xabar berish (§12);
• fiskal cheklar shakllanishini ta’minlash.

6.2. Platforma haqli:

• konsultatsiya narxlarini belgilash va ularni o‘zgartirish;
• ma’lumot joylashtirish qoidalarini belgilash va Shifokor profillarini moderatsiya qilish;
• Shifokorning hujjatlari va ma’lumotlarini istalgan vaqtda qayta tekshirish (verifikatsiya), zarur hollarda qo‘shimcha hujjatlar so‘rash;
• Ofertani, shu jumladan §3 taqiqlarini buzgan Shifokorning kirishini to‘xtatib qo‘yish;
• komission mukofotni ushlab qolish;
• konsultatsiyalar sifatini nazorat qilish maqsadida Foydalanuvchilar fikr-mulohazalarini yig‘ish va reyting tizimini yuritish;
• Oferta shartlarini §12 tartibida o‘zgartirish.

6.3. Platforma konsultatsiyalar ijrochisi emas, Shifokorning kasbiy xulosalariga aralashmaydi va ularning mazmuni uchun javobgar emas, bundan §11 da nazarda tutilgan hollar mustasno.

§7. SHIFOKORNING HUQUQ VA MAJBURIYATLARI

7.1. Shifokor majbur:

• konsultatsiyalarni §3 da belgilangan doirada, kasbiy etika normalari va O‘zbekiston Respublikasi qonunchiligiga muvofiq ko‘rsatish;
• o‘zini o‘zi band qilgan shaxs maqomini saqlab turish hamda maqomning tugatilishi, diplom yoki sertifikat amal qilishining to‘xtatilishi, tibbiy faoliyatga oid cheklovlar joriy etilishi haqida darhol Platformaga xabar berish;
• tavsiyaviy xulosalarni shakllantirish
• vrach sirini saqlash ("Fuqarolar sog‘lig‘ini saqlash to‘g‘risida"gi Qonunning 45-moddasi) va shaxsga doir ma’lumotlar to‘g‘risidagi qonunchilikka rioya etish;
• konsultatsiya oldidan Foydalanuvchining axborotlashtirilgan ixtiyoriy roziligini olish;
• shoshilinch yordam talab etilishi mumkin bo‘lgan belgilar aniqlanganda Foydalanuvchini zudlik bilan tez tibbiy yordamga yoki tibbiy tashkilotga yo‘naltirish;
• xavfsizlik intsidentlari haqida 24 soat ichida Platformaga xabar berish;
• konsultatsiyalarni faqat Platforma orqali rasmiylashtirish, Platforma orqali kelgan Foydalanuvchilar bilan hisob-kitoblarni Platformani chetlab o‘tgan holda amalga oshirmaslik (tashriflarni yashirmaslik).

7.2. Shifokor haqli:

• ish jadvalini mustaqil belgilash;
• jadval va mavjud vaqtlarni Shaxsiy kabinet orqali boshqarish;
• §11 tartibida Shartnomani bekor qilish.

§8. MEHNAT MUNOSABATLARI MAVJUD EMASLIGI

8.1. Ushbu Shartnoma fuqarolik-huquqiy xarakterga ega. Shartnoma Platforma bilan Shifokor o‘rtasida mehnat munosabatlarini vujudga keltirmaydi; Shifokor Platformaning xodimi hisoblanmaydi, ichki mehnat tartibiga bo‘ysunmaydi, unga mehnat qonunchiligida nazarda tutilgan kafolatlar (mehnat ta’tili, mehnatga haq to‘lash kafolatlari va boshqalar) taqdim etilmaydi.

8.2. Shifokor ish vaqtini, jadvalini va yuklamasini mustaqil belgilaydi, o‘z faoliyatini o‘z tavakkalchiligida amalga oshiradi.

§9. SHAXSIY MA’LUMOTLAR VA VRACH SIRINI HIMOYA QILISH

9.1. Shaxsga doir ma’lumotlarni qayta ishlash “Shaxsga doir ma’lumotlar to‘g‘risida”gi Qonun (O‘RQ–547), VMQ–570 va VMQ–70 talablariga muvofiq amalga oshiriladi.

9.2. Rollarni taqsimlash. Platforma va Shifokor Foydalanuvchilarning shaxsga doir ma’lumotlarini o‘z funksiyalari doirasida qayta ishlaydi: Platforma – axborot tizimini yuritish, to‘lovlar va hisobotchilik doirasida; Shifokor – konsultatsiya ko‘rsatish doirasida. Har bir Tomon o‘z sohasidagi buzilishlar uchun mustaqil javob beradi.

9.3. Lokalizatsiya. O‘zbekiston Respublikasi fuqarolarining shaxsga doir ma’lumotlari faqat O‘zbekiston Respublikasi hududidagi serverlarda saqlanadi va qayta ishlanadi (O‘RQ–547ning 27-1-moddasi, VMQ–570). Tibbiy xarakterdagi ma’lumotlarning himoya darajasi – 2 dan past emas (VMQ–570).

9.4. Vrach siri ("Fuqarolar sog‘lig‘ini saqlash to‘g‘risida"gi Qonunning 45-moddasi) alohida huquqiy rejim bilan himoyalanadi; oshkor qilish faqat qonunda belgilangan holatlarda ruxsat etiladi. Vrach sirini saqlash majburiyatlari muddatsiz amal qiladi.

9.5. Shifokorga konsultatsiya davomida olingan Foydalanuvchi ma’lumotlarini Platforma tashqarisidagi shaxsiy qurilma va tashuvchilarda saqlash, uchinchi shaxslarga uzatish yoki Shartnoma maqsadlaridan tashqarida ishlatish taqiqlanadi.

§10. TOMONLAR JAVOBGARLIGI

10.1. Shifokor konsultatsiyalar mazmuni, berilgan tavsiyalarning asoslanganligi, §3 taqiqlariga rioya etish, vrach siri va shaxsga doir ma’lumotlarni himoya qilish (o‘z sohasida), taqdim etgan ma’lumotlarining haqqoniyligi uchun to‘liq javobgar. Platforma texnik mavjudlik, hisob-kitoblar to‘g‘riligi va fiskalizatsiya, o‘tkazmalarning o‘z vaqtida amalga oshirilishi hamda konsultatsiya vaqtini qayd etish uchun javobgar.

10.2. Javobgarlikni cheklash. Platformaning ushbu Shartnoma bo‘yicha umumiy javobgarligi so‘nggi 12 (o‘n ikki) oy uchun Shifokordan olingan komission mukofot miqdoridan oshmaydi.

10.3. Cheklovdan istisnolar. Javobgarlikni cheklash quyidagilarga nisbatan qo‘llanilmaydi: (a) fuqarolar hayoti yoki sog‘lig‘iga yetkazilgan zarar (FK 985–1001-moddalar); (b) qasd yoki qo‘pol ehtiyotsizlik; (c) shaxsga doir ma’lumotlar rejimini (O‘RQ–547) va vrach sirini buzish; (d) intellektual mulk huquqlarini buzish; (e) Foydalanuvchilar va Shifokorga mablag‘ qaytarish hamda soliqlarni hisoblash va to‘lash majburiyatlari.

10.4. Shifokor §3 taqiqlarini buzgan holda Foydalanuvchiga yoki uchinchi shaxslarga yetkazilgan zarar uchun mustaqil va to‘liq javob beradi hamda bunday buzilishlar munosabati bilan Platformaga qo‘yilgan talablar bo‘yicha Platformaning hujjatlar bilan tasdiqlangan xarajatlarini qoplaydi.

§11. AMAL QILISH MUDDATI, FORS-MAJOR VA BEKOR QILISH

11.1. Shartnoma akseptdan boshlab 12 (o‘n ikki) oy muddatga tuziladi va 30 kalendar kun oldin bekor qilish to‘g‘risida xabar bo‘lmasa, avtomatik ravishda shu muddatga uzaytiriladi. Har qanday Tomon boshqa Tomonga 30 kalendar kun oldin xabar berib, Shartnomani bekor qilishi mumkin. Shifokor, shuningdek, Shaxsiy kabinet orqali akkauntni o‘chirish to‘g‘risida ariza yuborish yo‘li bilan Shartnomani bekor qilishi mumkin.

11.2. Platforma quyidagi muhim buzilishlarda (FK 382-moddasi) Shartnomani darhol bekor qilishi mumkin: §3 taqiqlarining buzilishi; o‘zini o‘zi band qilgan shaxs maqomining tugatilishi; diplom yoki sertifikatning haqiqiy emasligi yoxud amal qilishining to‘xtatilishi; profildagi ma’lumotlarning yolg‘onligi aniqlanishi; tizimli (6 oy ichida 3 va undan ko‘p) tasdiqlangan shikoyatlar; vrach sirini yoki ma’lumotlarni himoya qilish qonunchiligini buzish; tashriflarni tizimli yashirish; akkauntdan uchinchi shaxslar foydalanishiga yo‘l qo‘yish; korrupsiyaga qarshi qonunchilikni buzish.

11.3. Fors-major. Tomonlar tabiiy ofatlar, epidemiyalar va pandemiyalar, harbiy harakatlar, terroristik aktlar, hokimiyat organlari qarorlari, keng ko‘lamli kiberhujumlar va boshqalar sababli majburiyatlarni bajarmaganlik uchun javobgarlikdan ozod etiladi. Fors-major 90 (to‘qson) kalendar kundan ko‘proq davom etsa, har qanday Tomon 15 ish kuni oldin xabar berib, jarimalarsiz Shartnomani bekor qilishi mumkin.

11.4. Bekor qilish oqibatlari. Boshlangan konsultatsiyalar yakunlanishi lozim; yakuniy hisob-kitob – 30 kun ichida; Shaxsiy kabinetga faqat o‘qish rejimida kirish – 90 kun (ma’lumotlarni eksport qilish uchun); tibbiy xarakterdagi hujjatlar qonunchilikka muvofiq saqlanadi. §10, §11 (vujudga kelgan majburiyatlar qismida) va maxfiylik bo‘yicha qoidalar bekor qilishdan keyin ham kuchda qoladi.

§12. OFERTA SHARTLARINI O‘ZGARTIRISH

12.1. Platforma Oferta shartlarini, shu jumladan Tariflarni, Shifokorga kamida 30 (o‘ttiz) kalendar kun oldin Shaxsiy kabinet va/yoki elektron pochta orqali xabar berib, bir tomonlama o‘zgartirishi mumkin.

12.2. To‘g‘ri xabar berilgan kundan boshlab 30 kunlik muddat o‘tgandan keyin Platformadan foydalanishni davom ettirish Shifokorning yangi shartlarga roziligini anglatadi; rozi bo‘lmagan holda Shifokor jarimalar qo‘llanilmasdan §12 tartibida Shartnomani bekor qilish huquqiga ega.

§13. NIZOLARNI HAL QILISH

13.1. Nizolarni sudgacha hal qilish tartibi majburiy. Sudgacha yozma murojaat (talabnoma) holatlar tavsifi, buzilgan qoidalarga havola, talab va tasdiqlovchi hujjatlarni o‘z ichiga olishi kerak. Javob muddati – 15 (o‘n besh) ish kuni.

13.2. Nizolarni hal qilish bosqichlari: (1) majburiy sudgacha tartib (15 ish kuni); (2) muzokaralar/mediatsiya (30 kalendar kun); (3) texnik nizolar bo‘yicha ekspertiza – kelishuv bo‘yicha; (4) sud.

13.3. Foydalanuvchilarning konsultatsiyalar sifatiga shikoyatlari Shifokor tomonidan 10 ish kunidan ko‘p bo‘lmagan muddatda ko‘rib chiqiladi; Platforma dastlabki qabulni va 1 ish kuni ichida shikoyatni Shifokorga uzatishni amalga oshiradi.

13.4. Oferta O‘zbekiston Respublikasi qonunchiligiga muvofiq tartibga solinadi. Sudgacha tartibda hal etilmagan nizolar fuqarolik ishlari bo‘yicha Shayxontohur tumanlararo sudida ko‘rib chiqiladi, qonunchilikda imperativ tarzda boshqacha taalluqlilik belgilangan hollar bundan mustasno.

§14. INTELLEKTUAL MULK

14.1. Platforma dasturiy ta’minoti, dizayni va interfeysi, "Chaqqon Med" tovar belgisi, ma’lumotlar bazalari va algoritmlariga bo‘lgan mutlaq huquqlar "Consciousness" MChJga tegishli. Shifokorga Platformadan Shartnoma doirasida foydalanish uchun oddiy (mutlaq bo‘lmagan) huquq beriladi; uni uchinchi shaxslarga berish taqiqlanadi.

14.2. Shifokor o‘zi yaratgan tavsiyaviy xulosalar, metodikalar, shaxsiy brend va obro‘ga bo‘lgan huquqlarini saqlab qoladi.

§15. QONUNCHILIKKA RIOYA ETISH VA KORRUPSIYAGA QARSHI TALABLAR

15.1. Shifokor quyidagilarga rioya etishga majbur: "Fuqarolar sog‘lig‘ini saqlash to‘g‘risida"gi Qonun (O‘RQ–265-I); "Shaxsga doir ma’lumotlar to‘g‘risida"gi Qonun (O‘RQ–547); "Kiberxavfsizlik to‘g‘risida"gi Qonun (O‘RQ–764); "Iste’molchilar huquqlarini himoya qilish to‘g‘risida"gi Qonun (O‘RQ–221-I); korrupsiyaga qarshi qonunchilik (O‘RQ–419, O‘RQ–931); "Reklama to‘g‘risida"gi Qonun (O‘RQ–776); soliq qonunchiligi (o‘zini o‘zi band qilgan shaxslar faoliyatiga oid qismda).

15.2. Korrupsiyaga qarshi band. Tomonlar pora yoki boshqa noqonuniy afzalliklarni taklif qilmaydi, bermaydi, va’da qilmaydi va qabul qilmaydi (O‘RQ–419, O‘RQ–931). Shartnoma bemorlarni yo‘naltirish uchun to‘lovni nazarda tutmaydi. Tasdiqlangan korrupsiyaviy huquqbuzarlik kompensatsiyasiz Shartnomani darhol bekor qilish uchun asosdir.

§16. FOYDALANUVCHINING ISTE’MOLCHI SIFATIDAGI HUQUQLARINI HIMOYA QILISH

16.1. Foydalanuvchi iste’molchi bo‘lgan munosabatlarga "Iste’molchilar huquqlarini himoya qilish to‘g‘risida"gi Qonun qo‘llaniladi: axborot huquqi (5-modda), xavfsizlik (7-modda), xizmatdan voz kechish (20-modda), zararga yo‘l qo‘ymaslik (18-modda). Platforma Foydalanuvchini konsultatsiya ko‘rsatilishidan oldin narx, shartlar va konsultatsiyaning axborot-maslahat xarakteri haqida xabardor qiladi hamda qoidalarning o‘zbek va rus tillarida mavjudligini ta’minlaydi. Shifokor konsultatsiya mazmuni uchun, Platforma texnik mavjudlik va hisob-kitoblar to‘g‘riligi uchun javobgar.

§17. YAKUNIY QOIDALAR

17.1. Hujjatlar ierarxiyasi: O‘zbekiston Respublikasi qonunchiligining imperativ normalari (shubhasiz ustuvorlik) > ushbu Oferta > Platforma siyosatlari.

17.2. Maxfiylik. Tomonlar Shartnomani bajarish jarayonida olingan ma’lumotlarning maxfiyligini Shartnoma muddati va undan keyin 3 yil davomida saqlaydi; vrach siri va maxsus toifadagi ma’lumotlar bo‘yicha majburiyatlar – muddatsiz.

17.3. Huquqlarni o‘tkazish. Boshqa Tomonning yozma roziligisiz huquqlarni o‘tkazishga yo‘l qo‘yilmaydi; Platforma qayta tashkil etilish paytida 30 kun oldin xabar berib, huquqlarni huquqiy vorislariga o‘tkazishi mumkin (Shifokorning jarimalarsiz bekor qilish huquqi bilan). Shifokor Shartnoma bo‘yicha majburiyatlarini shaxsan bajaradi; ularni uchinchi shaxslarga topshirish taqiqlanadi.

17.4. Ajralmaslik. Biror qoidaning haqiqiy emasligi boshqa qoidalar kuchini yo‘qotmaydi.

17.5. Til. Ofertaning rasmiy tili – o‘zbek tili; boshqa tillardagi versiyalar mavjud bo‘lganda o‘zbek tilidagi versiya ustuvorlikka ega.

17.6. Kiberxavfsizlik Platforma tomonidan O‘RQ–764ga muvofiq ta’minlanadi.

17.7. Xabarlar. Tomonlar o‘rtasidagi yuridik ahamiyatga ega xabarlar Shaxsiy kabinet, Platformada ko‘rsatilgan elektron pochta manzillari yoki Platforma bildirishnomalari orqali yuboriladi va yuborilgan kunning ertasidan e’tiboran yetkazilgan hisoblanadi.

O‘zini o‘zi band qilgan shaxs maqomiga ega shifokorlar uchun ommaviy oferta.
"Chaqqon Med" platformasi.

Versiya 1.2.

© 2026 "Consciousness" MChJ. Barcha huquqlar himoyalangan.